عبد الحميد عبد الهادى

ما الذى يمكن كتابته عن عبد الحميد عبد الهادى؟.. ياااه انت التى تكتبين؟! اشعر باننى ينبغى الان ان اكتب وليس غدا كما قررت .. الان ساكتب..رغبة ملحة فى الكتابة عنه – هكذا كانت كل رغباته ملحة .. ربما هو الموت المبكر الذى يجعل كل ما لدينا ملحا جدا.. احاول ان اكتب عنه شيئا جيدا..فهو يستحق..رغبة فى البكاء الان تجتاحنى عليه..لن ابكى ..انا لا اعرفه لابكى ..ساكتب بشكل حيادى .. لا يمكن ان تكتب عن عبد الحميد عبد الهادى بشكل حيادى .. لم يكن مجرد شاعر سبعينى ماهر.. كان نبيا ..يتنبىء بالغيب ..سامحنى يا الله يا من شكلته على هذا النحو..كان طبيبا وشاعرا وانسانا مختلفا.. لم يكن عاديا ولا يكتب عن العادى كل ما يكتبه نبوءة قد تتحقق يوما .. يكتب عن آسر ابنه الاول قبل ميلاده يسنوات :
أسميتك آسر
اذ اقرا فى عينيك تبادلك الايام محبتها
............................................
............................................
............................................
آسر
يا ولدى
يا اصلد عيدان شجيرتنا
...........................
..............................
.............................
خذ اشعار ابيك بقوة
لا شىء سوى الاشعار اورثك

يولد اسر ويرث اشعار ابيه فيصبح شاعرا. يرانى عند ميلادى فينظر لعينى ويبلغ نبوئته الطبية هذه المرة"البنت ده نظرها هيكون قوى جدا " فاكون كما قال.. شىء ما يربطنى به ..قلت ذلك لاسر منذ ساعات ..اريد ان اكتب لافهم ما الذى يربطنى بعبد الحميد ذلك الشاعر الذى لم اسمعه فى اى شريط مسجل لكننى عندما اقرا له قصيدة قطر عجوز ..ابكى وعندما اقرا قصيدة آسر ابكى بالنيابة عن آسر .. كان جميلا ودافئا وغجريا ومتعبا (بكسر وفتح التاء) منذ ان كنت صغيرة وانا اسمع عنه .. يحكى ابى حكايات مضحكة عنه كان بشوشا وحزينا جدا ..كان شابا وكهلا .. لماذا اتحدث عنه وكانى اعرفه..للمرة الالف اقول لنفسى انت لا تعرفينه هو شاعر وكفى .. لماذا يكون نبيا ودافئا وحزينا و........... اكره كل ذلك ..كان كذلك.. ماذا يمكنك ان تكتبى .. ماذا كنتى تتوقعين؟ ربما توقعتى انك ستكتبين دراسة تحليليلة فى شعر عبد الحميد .. انت لاتعرفين عنه سوى ما قلتيه ربما اكثر قليلا .. موته فى حادث سيارة يقول البعض انه مدبر لاكتشافه فساد ما – لا اعرف وربما حبه لزوجنه امال الوحيدة التى تستطيع ان تشم فيها رائحة عبد الحميد. تلك الرائحة التى شممتها فى بيته عندما دخلته لاول مرة.. والتى تكمن فيه اشيائه الخاصة كما كانت دوما ..ماذا ايضا يمكنك ان تضيفيه..لا تسفهى كل شىء وتخضعيه لمنطقك الغبى.. هناك اشياء لا يمكن خضوعها للمنطق ..هكذا كان هو وابيك وعمر نجم ومحمد مستجاب و.................
جيل كامل ترك المنطق ومات ..لم يتحملوا هروب المنطق ربما ..حتى موتهم لم يكن منطقيا .. اتسائل رغما عنى لماذا يا الله؟! ..تنساب دموعى بلا ادنى تفكير فى منطقيتها .. اشعر بانه سعيدا وانه يشعر بى ويفهم هو ويتنبا لماذا تلك الرابطة بينى وبينه؟
يدق فى اواخر السبعينات على ابواب قبره فيكتب من اجمل ما كتب ليتنبا بموته (حدوتة قطر بضاعة عجوز) اقرا واتمتم بكلماته لتهدا روحه ورغما عنى اتمتم بالفاتحة
الى الصديقين اسامة عفيفى وسامى كمال
تم تم .. تم تم .. تم تم
سامع... سامع يا جرس
انا ماشى اهه
رغم انى لسه ما لحقتش عجلاتى
.. انا ماشى
تش .. .. تش
باى باى ..باى باى يا محطة
ودا رغم انى بحبك جدا
وبحب ارصفتك واكشاك السيمافور..والمبنى
الجربان.. والناظر
نباتشى التحويلة
حتى غفيرك دا اللى تملى بيتسربع ويرن الجرس
المدعوق.. .. قبل ما آخد نفسى
باى باى يا محطة
ومع انى دايما باتلهف ع الوقت اللى بارتاح على
رصيفك فيه
فانا ماشى ومش زعلان
اصلى خلاص اتعودت ان اللى بحبه
بيسيبنى ..يا اسيبه
انا ماشى ..ماشى ومش زعلان
تتش ..تتش.. تتش
انا قطر بضاعة عجوز تعبان
بازحف على مهلى قوى
انا مش كسلان
ولا افرق عن ايها ديزل ركاب
ولا غير ان الدنيا ادته اربع عربيات
شيك قوى ونضاف وخفاف
ورزتنى انا بحمول ما لهاش اول من اخر
انا يمكن اجمد منه
لكن .. اذا هو معدى انا بتاخر
مرة يزمرلى ويسالنى عن الصحة
ومرات يجرى ويطنش وعينيه بين القضبان
انا مش زعلان
ما انا اصلى اتعودت وباستحمل
وكمان ..قلبى طيب جدا
فلا عمرى حبطت فى قطر زميلى
ولا دستش حد معدى على القضبان
تتش..تتش ..تتش
انا قطر عجوز مصدى وتعبان
احيانا ..وانا راكن فى محطة ..او فى المخزن
او على قضبان التحويلة
باتصاحب على قطورات كده زى حالاتى
عواجيز ومصديين
نتكلم ..يحكولى عن احمالهم وهمومهم
واشكيلهم .. من طول عربياتى
اذا واحد منهم هكع اجرة شوية لحد ما ياخد
نفسه
واذا خانى موتورى على السكة بيقطرنى واحد م
الاصحاب ع الورشة
لكن .. وفى كل الاحوال
نقعد مع بعض شوية
ونسلم على بعض ونمشى
بعد ما كون فعلا حبيتهم واتعودت عليهم
المؤلم..انى دايما ما باشوفهمش
واذا صادف مرو لمحت صديق..بيكون دايما
على الخط التانى
اول ما باشوفه جاى على باهدى
"ازيك يا صديقى
منهم اللى يهدى ويزمر يسالنى عن احوالى
ومنهم اللى بيعمل زى الديزل ويطنش
اقعد استرجع ايامنا اللى اتعكزنا فيها على بعض
تفر دموع الزيت من عينى وتنزل بين القضبان
تتش ..تتش ..تتش
انا قطر بضاعة عجوز ..تعبان
...... وادينى المرة دى بودع آخر قطرين ف
اصحابى
مش عارف ليه المرة دى حزين اكتر م العادة
ونفسى احود على ايها تحويلة
وافضل اعيط لما ارتاح
يمكن علشان دول آخر قطرين ف اصحابى
واكتر اتنين خزنت معاهم فترة طويلة
او يمكن علشان حاسس انى خلاص اتهديت
وقريب خالص يمكن ارمى العربيات المليانة دهية
واموت
واذا فكر واحد منهم فى المستقبل
- يعنى اذا فكر
ييجى ويسال عنى ها يتقال له
انى فى يوم هكعت على السكة وما لقتش اصحاب
تقطرنى.. ومت
فاتفكيت
واتبغت حديدة خردة لبتوع الروبابيكيا
توووت
انا هاركن حبة على التحويلة استنى لما اتعدوا
بعد ما تمشوا هاكمل
رغم انه ما عادشى على السكة غير الاحزان
توووت
انا قطر بضاعة عجوز ومصدى وتعبان
توووت
انا قطر بضاعة عجوز تعبان
توووت
توووت
6-10-1979