اكيد اخبار حلوه

المره ده اخبار جامدة بجد ..وسط البلد مولعه ..الاخبار جايه بتقول ان المتظاهرين بالالاف من الاخوان وغيرهم ..والقضاه ما دخلوش المحاكمة والامن حاول يقبض علي ياسر بس الناس شدته وفشلوا في القبض عليه ..فرحانه قوي ..وفرحانه اكتر اني قدرت اوصل جواب لمالك جوه السجن ..بس مش عارفه دخل ولا ايه ..لا والاهم عربية امن مركزي اتقلبت من علي كوبري سته اكتوبر بس حرام مات فيها ست عساكر ..لا بجد مش فرحانه فيها ..احنا دايما بنتعاطف مع العساكر الغلابه لو كان مات فيها ضباط مثلا كنت فرحت ..بس برضه حرام ...ما علينا هي ده غالبا اشاعة ..بس موقع كفاية ماكد الخبر ..عايزه افرح من غير ما اقلق علي حد ..عماله اقول هيقبضوا علي ياسر ..مش عارفه ليه هو معلق معايا من امبارح وعندي احساس عالي بكده ..فرحت لما شوفت الجواب اللي باعته علاء ..يعني اطمنت عليه ..عايزة اكد علي ان الناس تتبرع لمركز هشام مبارك علشان المعتقليين عددهم بيزيد والفلوس بتقل وعنوان المركز في البوست اللي فات

الساعة2 الضهر

هاتفتني صديقة من سجن طره واخبرتني انهم فكوا الاضراب عن الطعام امس والضابط بعت جابلهم فراخ وعصير وبطاطس والدنيا جوه كويسه وفاكه شويه وفي ناس دخلت زيارة من غير تصريح ليها بس دخلت مع حد معاه تصريح والجوابات اللي بعتناها وصلت لمالك ..وهم كويسين وخلوهم مع بعض من امبارح وقسموهم مجموعتين او ثلاثه ..يعني الدنيا كويسه ..اه صحيح كلمت ياسر وهو كويس دلوقتي ما اتقبضش عليه لسه ..لو في حاجة تانية جديدة هقول واللي عنده اخبار من وسط البلد يقولها ..اخر حاجه انهم مقفلين الدنيا خالص والبلطجية ماليين الشوارع