امن الدولة التى فى عقلى

اكتشفت امس انى جبانة جدا جدا ..يرسل عمرو اميل لى فيه تقرير يد ورسالة تقول " حاولى تصوريه 100 نسخة وانتى جايه ..اهتف بينى وبين نفسى يا خبر اسود ده منشورات ..اضحك من نفسى لان هذه الكلمة انتهت من زمان ولا اعرف ماذا يسمونها الان ..المهم تتلبسنى روح الشجاعة الزائفة واطمئن نفسى وانزل الى اقرب محل تصوير بعد دخول المحل الاول لطبع الورقة من على ا لجهازاقرر التصوير فيه لمعرفتى باصحابه لكننى فجاة اجده جالسا فى ركن من المحل ..صامتا وبيده مجموعة من الاوراق يعبث بها فى عصبية واضحة ..يسقط قلبى واتخيلنى وقد زعق لى وقتها ساقول له ان عمرو هو اللى قالى ..اخبى الورقتان المطبوعتان واحاسب عليهما بسرعة وبربكة.. ثم اسمعه ما تنساش تاخذ بالك من الاسهم اللى انا حاطتها لان ده كلام الدكتور..اضحك من نفسى عندما اعرف انه باحث وبيكتب رسالة عند الراجل لكنى كنت فد تشائمت من المحل..فاذهب الى اخر فلا يعجبنى من فيه واهتف لنفسى بان شكلهم مباحث الا انه بعد لف دام نصف ساعة اجد محل فيه بنت طيبة ساذجة تشاهد مسلسل الرجل الاخر وينقذنى اننى ايضا ساذجة مثلها واحب مشاهدة مسلسل الرجل الاخر فجلست لاشاهده معها بينما تنطلق ماكينة التصويرمخرجة لنا الاوراق .. الكارثة الاكبر بدت لى فى حملها ..وضعتها فى الشنطة وركبت المترو وظللت اتخيل سيناريو المهانة مع الضابط الذى سيطلب تفتيشى لكننى طمانت نفسى ان محطة العتبة عادة لا تتسم بالقلق واننى زيادة فى التمويه لم ارتدى اسود مثل ما اتفق عليه المتظاهرون..لكننى وجدت احدهم فى المترو ينظر الى ونظرت لحذائه وجدته حذاء ميرى لكنه بملابس مدنية عادية فاكتشفت اننى مراقبة واكيد عرفوا عن طريق التليفون وظلللت اتخيل السيناريو المهين ..فانا ساقر بكل ما يريونه بدون لمسى لكنه طلع واحد سخيف بيعاكس لكننى زيادة فى الاحتياط ركبت تاكسى من محطة العتبة وذلك لزيادة التمويه وبالفعل استقل تاكسى ..وانظر فى الموبايل فاجده خرب وبقى بيطلع الوان وكانه خارج لتوه من مباحث امن الدولة ..فالعن فى سرى موبينيل العميلة للمباحث وينطلق التفسير ..اكيد امن الدولة بوظ الموبايل علشان ما حدش يعرف مكانى ..وبينما انا افكر فى ذلك اذا باحدهم يوقف التاكسى ..والله قلبى وقع وكنت هطلع الورق من الشنطة وارميه من الشارع ..لكنه طلع واحد من اللى بينظموا المرور علشان المظاهرة وما لوش دعوة بالحكاية خالص وانا شخصيا ما اهموش فى حاجة ..يهاتفنى عمرو لتاخرى ..اشعر بانه قلق على فاحبه مع ان الامر كما اثق انه كان عاوز الورق بسرعة ..اخرج من التاكسى اعطى الرجل اربعة جنيهات فيصر على خمسة اعطيهم له حلاوةوصولى بالسلامة..وكل مظاهرة وانتم طيبين