نصوص جميله

علي الرغم من انني لم اقرا له من قبل ..الا ان اسامه الدناصوري كان قادرا علي سحبي الي عالمه طوال قرائتي لنصوصه في اخبار الادب والتي ستصدر في كتاب قريبا عن دار ميريت..اليكم بعض منها

امي تحبني

كلما زرت امي في الاسكندرية ، او في العزبة ، لم تنس مرة ان تسالني عن شيئين ، الاول

انت مش هاتريحني بقي يا اسامة واشوفك بتصلي؟

يا ابني أبوك محتاج حد يدعيله ف تربته . وانا لما اموت ..مين هاديعيلي يا اسامه؟ ، وتذكرني بالحديث ..ولد صالح يدعو له ..وتتركني وتذهب ، ابي كان شال يده من الموضوع ، قبل موته بعدة سنوات ، رغم انه هو الشيخ الازهري ، والامام والخطيب ، ومدرس الدين .ايضا كف كل من حولي: اخي ، وعمى عبد الستار ، ومن قبلهما جدى..الا امى

يا ابنى هو انت عاوز تتعذب دنيا واخرة؟

انت اتعذبت كتير في حياتك يا حبيبى، عاوز تدخل النار؟ طب وعذاب القبر يا بني؟

انا بصلى يا ماما ...بس مش بانتظام ، وربنا عالم..هو قريب منى ومطلع على كل حاجة

قوللى يا اسامه..انت مؤمن بربنا وبالاسلام؟ ومؤمن ان فيه جنه ونار؟..انت ايه يا ابنى قوللى؟

ايه يا مه اللى بتقوليه ده؟ يا خبر ، طبعا مؤمن ، ومؤمن جدا كمان . ( لم تصدقني يوما

فاجأتها يوم جمعة فى احدي زياراتى للعزبة . قمت ، وتوضات امامها بدون اى كلمة ، وقلت لعلاء اخى

يا الله بينا.. انت مش هاتصلى الجمعة والا ايه؟

علاء وقتها كان هو الذى يخطب بالناس و يؤمهم

ذهبت ، وصليت وسلمت علي الناس ، واحسست ببهجة قديمة..قرات الفاتحة، والتشهد ايضا ..لم اكن اذكره جيدا ..ورفعت اصبعى السبابة عدة مرات وانا جالس لقراءة التشهد ، كما كنا نفعل قديما

عندما عدت من الجامع ، كانت سعيدة..لكنها لم تصدقنى

في اذان العصر ذهب علاء ، وبقيت ..لم تنظر لي حتي ...وسافرت

عندما زارتني هذه المرة تكلمت اولا عن الامر التاني

انت مش هاتبطل السجاير بقى يا اسامة؟

انت مش وعدتني كذا مرة؟

انا كنت مبطل واللهى ، ولسه راجع من يومين ، باشرب تلات اربع سجاير في اليوم ، يعنى مبطل يا ماما

طيب

كنت جالسا علي الكنبه كالعادة ، ساندا ظهرى الى المخدات ، وفي يدى جريدة او كتاب ، وهى جالسة علي نفس الكنبة فى مواجهتي

الكنبة على شكل حرف

فجاة ..انكبت امى علي قدمى وقبلتها

امى قبلت قدمى

اصابنى الهلع

يا بنى يا حبيبى مش هاتصلى بقى وتطمنى عليك قبل ما اموت ..قصدها طبعا قبل ما تموت

هى خائفة حد الرعب من موتى قبلها ، هى تتوقعه وتستعد له ، لكنها لا تريدنى ان اذهب الى الجحيم

قمت مسرعا . لكنني عدت فورا للجلوس . كنت مريضا ، اعاني من الانيميا ، ولا استطيع الحركة بدون دوخة وضربات قلب سريعة ، اسمعها تدوى في راسى ، وتخرج من اذنى كدقات الطبول

لكنني قمت اخيرا ، وذهبت ، وتوضات ـ وجئت ، وفرشت السجادة امامها بالضبط ـ ووقفت اصلى. كانت تنظر لى بعيون غائمة، وانا لا اقدر على الانحناء للركوع ، ولا الجلوس على قدمي بين السجدتين .

كنت سعيدا لانها كانت راضية . الان كنت اراها راضية ..اكملت صلاتي جالسا تماما

امي ليست قاسية

امي تحبنى